სამი დღის წინათ, კონფედერაციათა თასზე იტალიის ნაკრების კარში ორი გოლის ავტორმა, ბრაზილიელმა ლუიშ ფაბიანუმ სერია A-ში გადაბარგების სურვილი გამოთქვა. უფრო მეტიც, მან ის კლუბიც დააკონკრეტა, რომლის ფორმის მორგებაც სურს."შესანიშნავი იქნება, თუკი "მილანში" თამაშის საშუალება მომეცემა. ეს უდიდესი კლუბია, რომელიც მუდამ უმაღლესი მიზნებისთვის იბრძვის. ამასთან, ძალიან მომწონს იტალიური ფეხბურთი, რომელიც ტაქტიკური სქემების ნამდვილ ჭიდილს წარმოადგენს. ვფიქრობ, ჩემი სათამაშო სტილი სერია A-ს კარგად მოერგება", - განაცხადა Sky Sport Italia-სთან საუბრის დროს 28 წლის ფორვარდმა."სევილიას" ბრაზილიელმა თავდამსხმელმა ბოლო პერიოდში შესამჩნევად მოუმატა და მსოფლიოს ერთ-ერთ საუკეთესო გოლეადორად ჩამოყალიბდა. საკმარისია აღინიშნოს, რომ ლუიშ ფაბიანომ ეროვნული გუნდის შემადგენლობაში ჩატარებულ 29 შეხვედრაში 20 გოლის გატანა მოახერხა.თავის მხრივ, სამხრეთამერიკელის გადაბირების საწინააღმდეგო "მილანსაც" არაფერი უნდა ჰქონდეს, მით უმეტეს, რომ "როსონერი" უკვე საკმაო ხანია მაღალი დონის ფორვარდის შეძენას ცდილობს. თუმცა, ამ შემთხვევაში საკითხავი ის რჩება, დათანხმდება კი "სევილია" თავისი ერთ-ერთი ლიდერის გასხვისებას?