იტალიის ფეხბურთელთა ეროვნული გუნდის მეკარე ჯანლუიჯი ბუფონი დარწმუნებულია, რომ კონფედერაციის თასზე ჯგუფური ტურნირის ბოლო შეხვედრა, რომელსაც სკუადრა აძურა ბრაზილიის ნაკრების წინააღმდეგ გამართავს, ტურნირის მშვენება გახდება. უდავოა, რომ დღესდღეობით ბრაზილიის ნაკრები საუცხოო სათამაშო ფორმაშია. ტურნირის სასტარტო შეხვედრებმა აჩვენა, რომ ბრაზილიელები ტრადიციულად კარგად აკონტროლებენ ბურთს და სახიფათო კონტრშეტევებს ანხორციელებენ. თუმცა, თუ ჩვენი და ბრაზილიელების ფუნქციონალურ მომზადებას შევადარებთ, უპირატესობა იტალიელების მხარესაა. ვფიქრობ, ეს საკმაოდ მნიშვნელოვანი ფაქტორია, რომელიც მომავალ შეხვედრაში დადებითი შედეგის მიღწევის საშუალებას მოგვცემს. ნებისმიერ შემთხვევაში, ძალიან საინტერესო მატჩი იქნება და ჩემი აზრით, ტრიბუნები ბოლომდე უნდა შეივსოს - განაცხადა ბუფონმა.აღსანიშნავია, რომ მომავალ თამაშში მარჩელო ლიპის შეგირდებს ჯგუფიდან გასასვლელად ბრაზილიასთან მხოლოდ გამარჯვება სჭირდებათ.
