იტალიის ფეხბურთელთა ეროვნული ნაკრების მთავარმა მწვრთნელმა მარჩელო ლიპიმ, კონფედერაციის თასის ჯგუფური ეტაპის მეორე ტურში აფრიკის ჩემპიონ ეგვიპტის ნაკრებთან 0:1 მარცხის შემდეგ განაცხადა, რომ "სკუადრა აძურა", ესპანეთის ნაკრების მსგავსად ვერასდროს ითამაშებს. ამასთან, Channel4-თან საუბარში ლიპიმ აღიარა, რომ ეგვიპტესთან წაგებაში საკუთარ დანაშაულსაც ხედავს, რადგან შეგირდებმა დავალებები ვერ შეასრულეს."პირველ ტაიმში ძალიან ცუდად გამოვიყურებოდით, რადგან ჩანაფიქრის განხორციელება ვერ მოხერხდა. შესვენების შემდეგ, თამაში გავაუმჯობესეთ, მაგრამ მეტოქის მეკარემ ყველა ჩვენი გეგმა ჩაფუშა. კონფედერაციის თასზე სუსტი გუნდები არ არიან და გამარჯვების მისაღწევად საუკეთესო თამაში უნდა აჩვენო. ნაკრებში სიახლეებს ვნერგავ, მაგრამ ისინი ჯერჯერობით არ მოქმედებენ. დღეში 10 საათიც რომ ვივარჯიშოთ, ესპანეთის დარ ფეხბურთს ვერასდროს ვითამაშებთ. ეს კულტურისა და საფეხბურთო აკადემიებში ახალგაზრდათა აღზრდის საკითხია. თუმცა, აქვე გეტყვით, რომ შეგვიძლია ვითამაშოთ კარგად, ძალიან კარგად და ხანდახან კი, ძალიან ცუდად. ჩვენ არ გვყოფნის მეგობრული სული, გული ან მაღალი დონის კომპაქტურობა" - თქვა ლიპიმ.ახლა, იმისათვის, რომ იტალიის ნაკრებმა კონფედერაციის თასის ნახევარფინალში გააღწიოს, დასკვნით ტურში ბრაზილიის ნაკრები აუცილებლად უნდა დაამარცხოს.
