იტალიის ფეხბურთელთა ეროვნული ნაკრების მეკარე ჯანლუიჯი ბუფონი, კონფედერაციის თასის ჯგუფური ეტაპის მეორე ტურში ეგვიპტესთან 0:1 მარცხს, არასწორ ტაქტიკას და თანაგუნდელთა საქმისადმი გულგრილ დამოკიდებულებას აბრალებს.ამის შესახებ ბუფონმა Channel4-თან საუბარში განაცხადა და დაამატა, რომ ახლა ისინი ქულების დათვლას უნდა შეეშვან და ბრაზილიელებთან ზედმეტი დაძაბულობის გარეშე ითამაშონ.ფაქტია, რომ განვლილ შეხვედრას არასწორად მიუდექით. გუნდმა თამაში მხოლოდ გაშვებული გოლის შემდეგ დაიწყო და სიტუაციის გამოსწორება ვერ მოვახერხეთ. ვფიქრობ, არასათანადოდ გავისარჯეთ და ანგარიშის გათანაბრებას ნაკლებად ვცდილობდით. შეხვედრის დასაწყისში, გუნდმა მეტოქის შესწავლა დაიწყო, არადა, სჯობდა, რომ პირველივე წუთებიდან თამამად შეგვეტია. ახლა ბრაზილიასთან სათამაშოდ ისე უნდა გავიდეთ, რომ ქულები არ ვითვალოთ. აუცილებლად გამარჯვება გვჭირდება. უნდა დავამტკიცოთ, რომ კონფედერაციის თასისა და მომავალი წლის მსოფლიო ჩემპიონატის მოგების ერთ-ერთ მთავარ კანდიდატთან, თანაბრად თამაში შეგვიძლია" - თქვა ბუფონმა.
